معلومات هامة للسيدات المبتدئات لقيادة السيارة

شوية معلومات بسيطه للاخوه المبتدئين فى السواقة 

✅تتاكدى من الماية 

✅تتاكدى من الزيت ولو لقيتى الزيت لونه شبه الطحينة يبقى متتحركيش بالعربية لانها كدا طحنت وهتبوظى الموتور

✅تلفى عالاربع فرد كاوتش تتاكدى ان مفيش حاجة نايمة

✅تظبطى قعدتك دراعك ميبقاش مفرود للاخر لان مع اول فرملة قوية ايدك هتتكسر 

✅رجلك تبقى طايلة الدواسات وجايبة الدبرياج للاخر لو مش طايلة الدواسات ومش طايلة تشوفى الكبوت اقعدى على مخدة

✅تظبطى المرايات

✅ندوس دبرياج نمور الفتيس ندور العربية علشان لو دورنا وهى واخدة غيار هتنط مننا

✅متنسيش تنزلى فرامل اليد علشان الطنابير متبوظش

✅لازم نثبت المكان اللى هنركن فيه علشان لو قبل ما نطلع بالعربية لقينا بقعة تحت العربية نبقى عارفين ان دى مننا وننتبه ان فى حاجة غلط

✅لما نركن منحضنش عالرصيف علشان لو الفردة نامت يبقى عندنا وسع نحط الكوريك ونغيرها وتتطلع من مكانها الا اذا كان معاك كمبروسر هوا 

✅ركزى مع التابلوه اى نور يظهرلك فجأة اقفى وافهمى دا بتاع ايه 

✅خلى بالك من النور العالى بالليل بيزعج اللى قدامك فى العكسى

✅اتاكدى ان فى بنزين اكتر من ربع التانك علشان الشوائب 

✅اتعلمى تنضفى قواطيش البطارية لو عربيتك وبطاريتك قديمة بسبشرط تكونى شايلة المفتاح من الكونتاكت

✅رجلك تبقى خفيفة عالبنزين 

✅لو مانيوال لازم ندوس دبرياج للاخر علشان نحافظ عالتروس

✅لو مانيوال لازم تبقى رجلنا ميزان حساس بمعنى هنشيل سنة من الدبرياج نزود سنة عالبنزين وهكذا

✅تسيبى مسافة أمان

✅متنسيش الجنب اليمين بيبقى بالنسبة ليكى زاوية بعيدة ومنسية وممكن تشيلى صف عربيات على يمينك لو مركزتيش

✅نظرات سريعة كل شوية على ال٣ مرايات كل مراية ثوانى

✅لو العربية اللى وراكى ظهرتك فى الربع الخارجى العلوى فى المراية يمين او شمال متتخطيش حتى لو مدية اشارة لانه واخد سرعته

✅الإشارات حتى لو لوحدك فى الطريق لانها مسألة تعود

✅الاشارات قبل الدخول فى الشوارع الجانبية بمسافة كافية 

✅الاشارات قبل التخطى من حارة لحارة 

✅الاولوية للى فى الصينية

✅الاولوية للى ماشى فى طريق مستقيم بس نراعى اخطاء الغير اللى بيخرجوا من شوارع جانبية بسرعة عالية

✅تجنبى اخطاء الغير 

✅متمشيش عكس حتى لو الطريق مختصر وهيوفر عليكى

✅متدخيش ملف على سرعة عالية 

✅الملفات يمين على ضيق شمال على واسع

✅فى الصينية تلتزمى بالحارة بتاعتك الدخول والخروج

✅اعرفى قواعد السير والاولوية بتبقى لمين 

✅اتعلمى لغة اشارة النقل 

✅ويفضل متقربيش من النقل نهائى لانك بالنسبة ليه نقطة عمياء

✅اتعلمى ان اللى قدامك يبقى دليلك لو لقيتيه بيهدى تهدى لو لقتيه داس فرامل يبقى تفهمى انه قابل حاجة

✅احسن دليل بيبقى الميكروباص والتاكسى بيبقوا حافظين الطرق

✅خايفة او عندك عطل شغلى الانتظار والتزمى بالحارة اليمين 

✅فرملى قبل المطب والحفر بمسافة كافية علشان العربية متتهبدش منك يعنى اقصى سرعتك تكون ٢٠ 

✅لو شارع اول مرة تمشى فيه امشى بالراحة علشان المفاجآت

✅راعى سرعتك فى المناطق السكنية والاماكن اللى فيها مدارس

✅رجلك جاهزة عالفرامل قبل المطبات والملفات والتقاطعات والمنزل لأن العربية بتكون بتجرى لوحدها 

✅السرعة تكون مناسبة للغيار يعنى مينفعش امشى على ٤٠ وجايبة الرابع او العكس

الاول اقصى تقدير ٢٠

التانى اقصى تقدير ٤٠

التالت اقصى تقدير ٦٠ 

الرابع اقصى تقدير ٨٠

ودى هتبقى بالممارسة مش محتاجة تبصى عالعداد

✅متفاديش بالدركسيون فادى بالفرامل بمعنى لو قابلتك مشكلة مفاجئة زى مطب او حفرة او حد بيعدى او اللى قدامك فرمل على غفلة دوسى فرامل اخرك فى الفرامل ان اللى وراكى هيخبطك ودا طبعا مبيبقاش فرامل مفاجأة على سرعة عالية المفروض ان لو سرعتك عالية بتمورى الفتيس وتطبطبى عالفرامل وتنزلى بالغيار لأقل سرعة مناسبة للعداد

 والمفروض بيبقى اللى وراكى سايب مسافة أمان وانتى كمان تبقى سايبة مسافة بينك وبين اللى قدامك لأن مسافة الامان بتدى براح للفرامل المفاجأة يعنى الضرر هيبقى خفيف

لكن لو خليتى رد فعلك بالدركسيون بمعنى هتكسرى يمين او شمال مفاجئ ممكن تلبسى ١٠ عربيات فى بعض او تطلعى على رصيف تخبطى حد او تلبسى فى شجرة او عامود لا قدر الله 

✅لو هتخرجى من الركنة او ترجعى لورا لفى الدركسيون وظبطى اتجاه العجل قبل ما تتحركى 

✅هتهدى سرعة يبقى فرامل بس 

✅هتقفى خالص يبقى دبرياج وفرامل

✅اتعاملى مع كل اللى حواليكى انهم مبيعرفوش يسوقوا

✅لو العربية واقفة فى مطلع وخايفة تريح عاللى وراكى ندوس دبرياج للاخر ونحط رجلنا عالفرامل للاخر ننزل فرامل اليد ونرفع رجلنا من عالدبرياج بشويش لحد ما نلاقى العربية عملت رجة او رعشت او اتهزت نثبت الدبرياج على كدا ونشيل رجلنا من الفرامل بشويش نروح للبنزين نزود بشويش ونكمل الميزان على كدا

✅متقفليش الازاز وتعلى الكاسيت عالاقل علشان لو حد اداكى كلاكس ينبهك لشئ تسمعيه 

✅لو هتركنى فى مكان ضيق وخايفة روحى مكان تانى واسع علشان متأذيش حد حتى لو بعيد وهتمشى شوية 

✅فى الصيف متمليش تانك البنزين للاخر علشان الحرارة العالية بتخلى البنزين يتمم وممكن تعمل انفجار

✅متظبطيش الروج وانتى سايقة 

✅متسيبيش ولاعة او سبرتو او برفان فى العربية 

✅الدركسيون مش سميط هناكله وخايفين يتسرق ولا هو غطا حلة هيقع على رجلنا 

نخلى ايدينا هادية فى الحركة 

✅متدوسيش فرامل على سرعة عالية شيلى رجلك من عالبنزين ومورى وانزلى بالغيار يعنى قلليه والفرامل تبقى طبطبة 

✅لما تدخلى بنزينة شوفى اتجاه تانك البنزين يبقى ناحية تانك البنزين والمسدس

✅وانتى بتزودى البنزين تكونى مبطلة العربية 

✅فى الشتا اول ما نقعد فى العربية نفتح الازاز شوية قبل ما نقفل الباب علشان منعملش شبورة بالنفس بتاعنا

✅متفتحيش الريداتير والعربية سخنة لانه ممكن يحرقك

✅اى حد رخم عايز يتخطانى بعديه او حتى يزنق عليا بسيبه يعدى لأننا فى الاخر هنتقابل عند اول مطب 😅

✅السواقة متعة بس عايزة تركيز وانتى قدها 💪

البوست ماهو الا اجتهاد شخصى وعصارة افكارى 😅

في حال أعجبك الموضوع كل ما اوده منك هو نشر هذا الموضوع عبر أدوات المواقع الاجتماعية التالية: ايقونة فيس بوك وتويتر و +1 فى الشريط التالى