1. قطعية الكتف الكندوز (Beef chuck)
خواص القطعية:
- الكتف يعتبر من أقسى وأنشف قطعيات العجل، وده لإنه أكتر جزء بيستخدمه العجل عشان يتحرك. وبالتالي اللحمة من منطقة الكتف بتكون ناشفة عن منطقة زي الظهر مثلًا اللي بيطلع منها أكتر القطعيات طراوة في العجل زي العرق الفيليه.
- الكتف بيشكل جزء كبير من العجل وبينقسم لقطعيات تانية كتير لها مسميات مختلفة.
- بالرغم إن الكتف لحمته ناشفة، إلا إن قطعيات الكتف من القطعيات الأكتر نكهة وأشهى طعم.
أفضل طرق طبخ قطعية الكتف الكندوز:
- أشهر جزء من الكتف هو السن ولحمة السن ممكن الجزار يقطعها في صورة مكعبات تدخل في السلق، والطواجن بالخضار، ولا تصلح للشوي.
- لحمة السن تصلح جدًا لعمل المفروم عشان تعملي منه الكفتة المشوية، داوود باشا، أو البرجر أو العصاج العادي.
- في جزء واحد من الكتف ممكن يطلع منه شرايح لحمة ستيك تصلح للشوي اسمها (flat iron steak)، غير كده قطعيات الكتف كلها أفضل طريقة لطبخها هي الطهي الرطب يعني لازم إضافة المياه أو المرقة أثناء الطهي.
2. الفخدة الكندوز (beef Round)
أكلات الفخدة الكندوز – أكلات عيد الأضحى 2021 – alderspring
خواص القطعية:
- الفخدة برضه زي الكتف، بتشكل جزء كبير من العجل، وتعتبر قطعية رئيسية جواها قطعيات فرعية كتير بمسميات مختلفة، أشهرها والمعروفة أكتر عند الجزارين: وش الفخدة، السمانة، ظهر الفخدة، العرق التريبيانكو، والموزة والاتنين دول هنتكلم عنهم على حدى.
- اللحمة من منطقة الفخدة تعتبر نسبيًا من القطعيات الأقل طراوة لإنها في جزء من العجل معرض للحركة بشكل كبير، ودي قاعدة عامة في عالم اللحوم: كل ما كانت القطعية من منطقة معرضة للحركة أكتر، كل ما كانت أقسى وبتحتاج وقت أطول في الطبخ.
- وش الفخدة والسمانة بيطلع منهم البوتيك، ولحمتهم بتكون حمرا ما فيهاش دهون كتير وممكن يطلع منهم كباب الحلة كمان، أما ظهر الفخدة بتكون أنشف وأقسى لكن بتصلح جدًا للمفروم.
أفضل طرق الطهي الفخدة الكندوز
طرق طبخ الفخدة الكندوز – أكلات عيد الأضحى – 2020evergreenfoods
- الفخدة زي ما قلنا، فيها قطعيات فرعية متنوعة، منها اللي بيصلح للسلق والطواجن واليخني زي الموزة مثلًا، ومنها اللي بيصلح للشوي في الفرن زي العرق التريبيانكو، بعض الأماكن ممكن يطلع منها قطع ستيك تصلح للشوي زي الكولاته.
- وش الفخدة بيطلع منه مكعبات كباب الحلة اللي بتصلح للطبخ مع الخضار وللطواجن والسلق البطيء وكمان البوفتيك. وظهر الفخدة بيصلح للمفروم لإنه الأقل طراوة من قطعيات الفخدة.
- العكاوي أو ذيل العجل بيعتبر جزء من الفخدة وبيجود جدًا في عمل الطواجن وبتحتاج العكاوي طهي بطيء على نار هادية لأفضل نتيجة.
3. الموزة الكندوز (Beef shank)
أسماء قطعيات اللحوم – الموزة الكندوز – themeathub
أسماء قطعيات اللحوم – الموزة الكندوز – wildforkfoods
خواص القطعية:
- مين ما بيحبش الفتة، وأحلى فتة هي فتة الموزة طبعًا. الموزة هي اللحمة الموجودة في رجلين العجل الأمامية والخلفية، وأكتر حاجة بتميزها نسبة الكولاجين الموجود فيها اللي واضح جدًا في الصور. وده بقى مع الطبخ على نار هادية، بيتفتت ويتحول لجيلاتين وبيكون محبب عند كتير من الناس في الأكل.
- قطعية الأوسوبوكو هي نفسها الموزة بس بالعظم بتاع الرجل. وبيكون جوه العضم في شوية من النخاع اللي طبعا بيدي نكهة وفايدة كمان، والأوسوبوكو قطعية مشهورة جدًا في إيطاليا، بتتعمل بطريقة اليخني مع الخضراوات وبتطبخ على نار هادية لمدة طويلة (slow-cooking)، فبالتالي اللحمة بتدوب والصوص بتكون نكهته خرافية.
أفضل طرق طبخ الموزة الكندوز:
طرق طبخ الموزة الكندوز – أكلات عيد الأضحى – thekitchenmagpie
- الطبخ لمدة طويلة على نار هادية (slow-cooking) هو اللي هيخلي الموزة تدوب تمامًا وتستمتعي وانتي بتاكليها.
- ممكن تتسلق على نار هادية جدًا عشان تستوي كويس وتدوب. وممكن تتطبخ مع طواجن الخضار في الفرن أو تتعمل في أي نوع من اليخنات، وطبعًا لا تصلح مع الشوي أو أي طهي جاف من غير إضافة مرقة أو سوايل.
4- أسماء قطعيات الستيك
أشهر قطعيات الستيك:
- قطعة الإنتركوت Strip-Loin
- قطعة التي بون ستيك T-Bone Steak
- قطعة الريب آي Rib eye steak
أشهر قطعيات الستيك – أكلات عيد الأضحى – bbqdryrubs
أشهر قطعيات الستيك – أكلات عيد الأضحى 2021 – ottogrill
- التلات قطعيات دول هم قطعيات ستيك ويعتبروا من القطعيات الطرية لإنهم من منطقة ظهر العجل، وهم من أكتر القطعيات المشهورة اللي بتقدمها مطاعم الستيك.
- بالنسبة للطعم، فهو بيختلف من قطعية للتانية وكل شخص بيكون ليه قطعية مفضلة أنا بالنسبة لي الأعلى والأفضل طعمًا هي الريب آيRib-eye.
- الاختلاف بين التلاتة هو إن الإنتركوت (strip-loin) فيها شريط من الدهون الخارجية حوالين قطعة الستيك، أما الريب آي فيها نسبة عالية من الدهون برضه، لكنها داخلية جوه حتة اللحمة نفسها.
- أما بالنسبة للتي بون، هي قطعة مميزة جدًا لإنها عبارة عن قطعيتين من اللحمة بتفصل بينهم العظمة اللي على شكل حرف T، القطعيتين دول هما الفيليه والإنتركوت، ودي الجزار بيستخدم منشار كهربائي خاص باللحوم عشان يعرف يقطعها ويطلعها بالشكل ده مع العظم.
أفضل طرق طهي الستيك:
- الشوي طبعًا هو أفضل أسلوب لطبخ القطعيات دي، تقدري تشوحي القطعيات دي في طاسة تقيلة، وتكون سخنة جدًا بحيث تاخد لون من كل الجهات، وتكملي تسويتها في الفرن والوقت اللي هتحتاجه للتسوية هيعتمد بشكل كبير على سُمك قطعة الستيك.
- خطوة مهمة جدًا لنجاح الستيك هي إنك تريحي اللحمة بعد التسوية عشان العصارة اللي جواها تعيد توزيعها جوة قطعة اللحمة، ولما نقطعها، نلاقيها طرية ومليانة بالعصارة وjuicy.
- ممكن تقدمي الستيك مع أي صوص من اختيارك أو مع الزبدة المنكهة بأي بهارات أو أعشاب تحبيها.
5. العرق الفلتو أو الفيليه الكندوز (beef fillet-beef tenderloin)
العرق الفلتو أو الفيلية الكندوز – أكلات عيد الأضحى – greatbritishchefs
خواص القطعية:
- يعتبر أطرى قطعية في العجل، ونسبة الدهون فيه شبه معدومة.
- مكان القطعية: ظهر العجل الكندوز: كل ما زاد وزن العجل وعمره، زاد حجم العرف الفيلية ووزنه ولونه بيكون أغمق.
- العرق الفيليه يختلف تمامًا عن العرق التريبيانكو، أو بتسميه ستات البيوت العرق الروستو، اللي بنعمل منه الروست بيف. عرق الفيليه أطرى بكتير، بيستوي أسرع بكتير، لإنه من أكتر المناطق الطرية في العجل وهي منطقة الظهر. أما العرق التريبيانكو مكانه الفخدة، والفخدة من المناطق الأقل طراوة ولها خواص مختلفة.
العرق الفلتو أو الفيلية الكندوز – أكلات عيد الأضحى – themobilepizzeria
أسماء قطعيات اللحوم – أكلات عيد الأضحى – simply-delicious-food
أفضل طرق طبخ العرق الفلتو أو الفيلية الكندوز:
- تقدري تطبخي العرق الفيليه كامل على بعضه، عن طريق تشويحه على النار وتكملي طبخه في الفرن مع الخضراوات والبهارات أو الأعشاب العطرية.
- العرق الفيليه ممكن تطلبي من الجزار يقطعه في صورة قطع من الستيك بسمك 2 سم ، بتكون مناسبة جدًا للشوي على البوتجاز في طاسة أو شواية أو على الفحم، والفيليه ستيك واحدة من أشهر أطباق المطاعم المعروفة اللي كلنا بنطلبها ونحبها وبيتقدم جنبها أنواع كتير من الصوصات زي صوص المشروم وصوص الفلفل الإسود.
- يفضل تسوية الفيليه ستيك تكون medium well وما تستويش للآخر well done، وده لإن نسبة الدهون القليلة بتخليها عرضة إنها تنشف بسهولة وتشد لو استوت تسوية كاملة.
- تقدري تتفرجي على الفيديو ده عشان تعرفي أفضل طريقة لطبخ الفيلية ستيك
6- عرق التريبيانكو أو الروستو (Eye round)
عرق التريبيانكو أو الروستو – أكلات عيد الأضحى – beefitswhatsfordinner
عرق التريبيانكو أو الروستو – أكلات عيد الأضحى -reneeskitchenadventures
خواص القطعية:
- زي ما ذكرنا مسبقًا، عرق التريبيانكو موجود في منطقة الفخدة، وشكله بيختلف عن العرق الفلتو لإن سماكته واحدة من أوله لآخره زي ما هتلاحظوا من الصور.
- العرق التريبيانكو لا يصلح للشوي لإنه من القطعيات الناشفة اللي بتحتاج طهي رطب، يعني لازم نسويه في الفرن مع شوية من المرقة أو المياه ونغطيه بالفويل، وياخد وقته عشان يستوي كويس.
- اطلبي من الجزار يربط لك العرق التريبيانكو عشان يستوي بشكل متساوي ويحتفظ بشكله بعد التسوية.
أفضل طرق طبخ عرق التريبيانكو أو الروستو:
- شوّحي العرق بعد ما تتبليه بالملح والفلفل، وسويه في الفرن على حرارة 220 مع تشكيلة من الخضار زي البصل، الجزر، الكرفس والأعشاب العطرية وفصوص التوم مع كمية من المرقة، وغطيه كويس بالفويل لحد ما يستوي، وتقدري من باقي المرقة تعملي صوص جريفي (Gravy sauce) يتقدم معاه.
- تقدري كمان تسلقي العرق كامل وبعد السلق يتقطع شرايح ويتحمر في الزبدة والملح والفلفل.
الكلام عن اللحمة عمره ما يخلص، علم كبير قوي وبحر واسع من المعلومات. حاولت في المقال ده أجمع أغلب القطعيات المشهورة للحمة البقري، وأعرّفك على بعض من خصائصها وازاي تقدري تطبخيها بالطريقة السليمة. كل عيد أضحى وانتم طيبين، ولو عندك أي سؤال بخصوص طبخ اللحوم، ما تتردديش وابعتي لنا استفسارك.
ليست هناك تعليقات:
إرسال تعليق
ارجو من الزوار المشاركة بتعليقاتهم والاجابة على التعليقات