كيفية التعرف على السيارة اللى مغيرة ربع وراشة دواخل بطريقة علمية


لو هاتشترى عربية مستعمله لازم تكون عارف و فاهم الكلام دا عن صاج العربية و ازاى تفحصه.

أول ما تفكر تشترى عربية مستعلمه و تبداء تدور و تسأل سواء على الإنترنت او السوق, اول حاجه بتسمعها من البائع, العربيه فبريكه, فبريكه دواخل و رشه بره, راشه حزام, راشه نظافه,.....ألخ.
عايزين نعرف معنى الكلام دا و نفهم شويه حاجات و خبايا.
#راشه_جوه
و دا طبعاُ ناس كتير بتبعد عنه و بتخاف منه, و دا معناه ان العربيه تعرضت لحادثه جامده سمعت(وصل تأثيرها) لدواخل العربيه (هيكل العربيه من الداخل)  وإستدعى انه يسمكر الجزء دا و لازم يرش طبعاُ عشان الصداء و البارومه و الشكل الداخلى
(ملحوظة: فى ناس معدومى الضمير بيعملو ألاعيب عشان يدارو الرش دا زى انه يروش عليه شاى مغلى او يدهنه شيشلوك مائى عشان يبان الدهان باهت و قديم و ماتشكش انها لسه مرشوشه)

- طيب ندخل فى المهم, إيه الأجزاء اللى بتترش جوه
هانبدأ بالأخطر و اللى تخاف منه ثم الأقل خطورة
- قوايم الأبواب (معناه ان العربيه اتقلبت قبل كده على جنبها أو سقفها)
بتشوف الفنى اللى جاى يفحص العربيه بيفك جلد الأبواب دا عشان يشوف اى اثار لرش او لحام او استعدال فبيبص على قفل القايم (الزاويه القايمه لتقابل القايم مع التانى) شداد الباب (ممكن يكون عليه اثار دهان), كالون الباب (ممكن يكون عليه اثار دهان).
-      سقف العربيه
 معناه ان العربيه اتقلبت قبل كده على سقفها و فى الغالب بيأثر على القوايم و الكبوت و الشنطه و هيكل العربيه عموماً و غالباً بيتم تغيير سقف كامل أو فبرة السقف
- العربيه من الأمام (معناه ان العربيه عملت حادثه من الأمام)
ممكن يرش كارتيره, حوض, صدر, أو فرد الشاسيه و بيبان انك ممكن تلاقى أثار بويه على الموتور, على أجزاء الموتور, على الضفيره و سلوك الكهرباء, البطاحات, و كمان الفلتو للفبريكه بيختلف فى الشكل عن المرشوش و الفلتو الفابريكه بيكون ناشف.
- السيارة من الخلف (معناه ان العربيه عملت حادثه من الخلف)
بتكون راشه شنطه و فيها معجون, كارتيرات, دواخل الشنطه,


- العتب
ممكن يكون متغير لأن مانفعش فيه شفط, و دا بيتعرف من أمكان الفواصل و أماكن بنط اللحام لأن شكلها بيختلف عن الفبريكه و بنط لحام المصنع.
- من الأعمال التانيه انك بتنزل تحت العربيه تشوف لو فى بارومه او صداء, تشوف الشيشلوك و ياترى دا دهانها و لا دا شيشلوك مدهون, تراجع الفلتو للعربية بالكامل (شريط رفيع فى دواخل العربيه عند الأركان و زوايا تقابل الأسطح), تراجع أجزاء الهيكل من أبواب وكبوت وشنطه عشان تتأكد أن مافيش أجزاء متغيره فى العربية زى ابواب، رفارف، كبوت، أكصدامات و طبعاُ دا بيبان فى الفواصل و تطبيع كل جزء على اللى جنبه و خبطه ايدك عليه هايختلف صوتها عن بقيه صاج العربية.
ملحوظه (ممكن تكون العربية اتخبطت من قدام أو ورا و رشت جوه لكن لو رجعت للحادثه تلاقيها بسيطه, دا كله نصيب و قدر و سعات النتيجه مابتكونش زى توقعاتك)

- نتكلم بقى عن أخطر شئ و هو أن العربيه مغيره نص, ربع ألخ
و دا معناه انالعربيه عملت حادثه شديده جداً لدرجه ان ماينفعش فيها سمكره و بيكون الهيكل متدمر فى مكان كبير او جزء كامل,  فالفكره انه بيشيل الجزء دا بالكامل و يركب مكانه جزء جديد ( إستيراد لسيارات مقطعه من الخارج),
فأجزاء السياره المقطعه معروفه, الفنى يفحص اماكن أتصال الإجزاء دى ببعضها فى العربيه عشان يشوف لحامات و اثار بنط لحام وخصوصاً فى الفواصل الضيقه.

- راشه نضافه ( يعنى من غير طبقه معجون تحت الدهان)
ممكن تكون العربية راشه بره نظافه نتيجه سوء ظروف السواقه فى مصر من زحمه و شوارع ضيقه فممكن العربية تتحك او تتخدش, بيكون عيب بسيط جدا بتداوا ان العربيه تترش.
- راشه حزام (يعنى راشه داير ما يدور العربيه بأرتفاع من حز الأبواب من فوق لحد تحت العتب)
هنا ممكن تكون اتخبطت خبطات بسيطه و اتردد بعدها و حط طبقه معجون ورش, و ممكن تكون راشه نظافه بس و رش الحزام بس عشان هو اللى فيه خدوش و إحتكاكات.
ملحوظه: البائع بيقصد من كده انه يعرفك ان السقف و الكبوت و الشنطه للعربيه ماترشش يعنى ما عملتش حوادث او اتقلبت قبل كده على سقفها لقدر الله.
- راشه بره كلها
ممكن تكون اتعرضت لحادثه خابطه او ماشابه ذلك, فبيسمكر و يستعدل و يحط معجون و يرش, ممكن تعرف مكان الخبطه لو خبطت على صاج العربيه لو الصوت رنان يبقى كده مافيش معجون تحت الدهان, اما لو الصوت مكتوب فكده تفهم ان فى معجون تحت الدهان. و ممكن تكون راشه بره كلها نظافه بس نتيجه ان الدهان بهت و قرح من الشمس او الجو.

- ملحوظه مهمه
---------------------------------
كل الكلام دا عشان نفتح عنيك أنت و تبقى فاهم الدنيا فيها أيه و تفهم الفنى المفروض يقف فين و يدور علي ايه و يفحص ايه عشان تبقى عارف  هو فعلاُ بيراجع صح و فاهم و شايف شغله و لا بينصب عليك و بيدبسك فى البيعه,
لكن للأسف ماينفعش تعتمد على نفسك فى العمل دا بالذات لأنها يحتاج الى فنى متخصص عنده خبره عدى عليه عربيات كتير فاهم الصنايعيه زمايله و فاهم شغلهم و ألاعيبهم.
و نتمتنى الخير و الصالح للجميع.


في حال أعجبك الموضوع كل ما اوده منك هو نشر هذا الموضوع عبر أدوات المواقع الاجتماعية التالية: ايقونة فيس بوك وتويتر و +1 فى الشريط التالى

هناك 3 تعليقات:

ارجو من الزوار المشاركة بتعليقاتهم والاجابة على التعليقات


ويكيموبايل اخر اسعار الموبايلات واحدث العروض