الطريقة الشيطانية للكشف على لزوجة الزيت

 
دلوقتي لو حضرتك عايز تعرف اللزوجة بتاعة الزيت عندك كويسة أو لأ أو عايز تعرف هل الزيت اللي في الموتور عايز يتغير أو لأ أو عايز تعرف الزيت بتاعك كويس ولا لأ .. خد الطريقة دي وأدعيلي بقي :)
1- هتجيب منديل ورق (كنيليكس) طبقتين أو 3 طبقات فوق بعض
2- هتسحب عصاية الزيت وتنقط نقطة واحدة على المنديل
3- هتسيب المنديل ده دقيقتين ينشف حاجة بسيطة
4- بص علي المنديل هتلاقي 3 أشكال .. تعالي أقولك عليهم :-
الشكل رقم 1 بيكون دايرة اللي هي بقعة الزيت مفيش جواها حاجة ودي بتظهر في حالة إن الزيت بيكون لسة جديد .. 🖐
الشكل رقم 2 وده المهم بص أي بقعة زيت بيكون فيها دايرة كبيرة ودايرة صغيرة (الدايرة الصغيرة دي بؤرة الزيت هتلاقيها غامقة والكبيرة هتلاقيها فاتحة (الأتنين هتشوفهم في المنديل قدام منك) بص بقى لو الدايرة السودا (الصغيرة) دي وصلت "تلت" أو أقل من الدايرة الكبيرة يبقى الزيت بتاعك تمام ومش محتاج يتغيرأما في حالة لو الدايرة دي (السودا الصغيرة) وصلت "نص" الدايرة الكبيرة يبقى الزيت محتاج يتغير .. 👌

الشكل رقم 3 ده بيبقي عبارة عن شكل متعرج وكبير أوي وبيفرش علي المنديل لأن لزوجته صفر ولأن زي ما إحنا عارفين لزوجة الزيت بتحافظ علي معدل تماسكه في بعضه وهتلاقوه شكل ملوش ملامح تحس إنه رايح شمال في يمن ولفوق ولتحت وحتة صغيرة وحتة كبيرة فا الشكل ده لو لقيته يبقى الزيت ده مغشوش يا إما هو موجود في الموتور بقاله كتيييييييير أوي ولازم تغيره فوراّ وتشيله من الموتور .. 🚫
===============
فيه حركة بيعملوها بقي الناس اللي في سوق الجمعة أو أي سوق بتاع عربيات مستعملة فلنفترض إنك أنت الزبون الغلبان أنت طبيعي رايح عجبالك عربية فا هتشتريها فا هو يقولك إنك كل حاجة تمام تقوله طيب أنا عايز أكشف علي الموتوريقوم صاحب العربية حاطط للعربية زيت شنابر الزيت ده تقيل فيسدلك أي تسريب في إسطوانة الموتور (غش X غش) فا تروح حضرتك تكشف علي الموتور يطلعك كفائته 80% أو 90% فا أنت يا عيني تنبسط أوي وبعد شوية تلاقي السحب بيقل والموتور بيطلع في الروح .. 🚮
===============
برضو بنفس الطريقة اللي فوق دي قبل ما تشتري العربية المستعملة هتعمل الكلام ده على الزيت .. هتجيب برضو منديل وهتسحب عصاية الزيت وتحط نقطة على المنديل بعد كدة هتجيب نقطة على منديل تاني من أي زيت أصلي ويبقى أنت كدة عندك منديل عليه زيت من العربية اللي هتشتريها ومنديل تاني عليه نقطة زيت أصلي من أي زيت أصلي تختاره وهتشوف الفرق بنفسك وهلتاقي إن الزيت الأصلي مستقر زي شكل رقم 2 والنقطة بتاعته مش كبيرة هتلاقيها متوسطة أو صغيرة المهم هتكون أقل حجماّ من الزيت المغشوش .. 

في حال أعجبك الموضوع كل ما اوده منك هو نشر هذا الموضوع عبر أدوات المواقع الاجتماعية التالية: ايقونة فيس بوك وتويتر و +1 فى الشريط التالى