النهارده هنتكلم عن جزء هام جداً و خطير فى العفشة
بيضة المقص هيا نقطة اتصال المقص بجنب العفشة الأمامى اللى بيشمل المساعد و الطنابير و الكاليبرات و هيا اللى بتربط الجنب بشاسيه العربية علشان يفضل فى مكانه و العجلة ما تطلعش لبره او جوه و بتحافظ على ثبات الكوبلن فى مكانه لأن لو الفردة اتفتحت لبره الكوبلن هيملص من الفتيس
مكانها
فى طرف المقص نحية العجل تحت المساعد و بتتثبت بصامولة من أعلى
وظيفتها
تثبيت الركبة أو الجنب بتاع العفشة بالكامل فى مكانه لا يروح يمين ولا شمال للداخل او خارج الرفرف للحفاظ على ثبات الكوبلن و ثبات الركبة داخل شاسيه العربية و الحفاظ على الشاسيه لأن بيضة المقص لو انكسرت المساعد هيتلوح للخارج زى الصورة - يقوم يسحب معاه البطاحة من الداخل و ممكن يأثر على مكان رباط البطاحة
- كمان البيضة كل ما تكون ماسكة نفسها و محكومة كل ما بتلاقى العفشة ملهاش صوت و الدنيا تمام فى الاماكن المكسرة ببساطة لأنها بتتحرك هيا و المقص مع المساعد فوق و تحت مع حركة العجلة فلو كانت البيضة مبوشة أو سايبه هتسمع صوت تخبيط كل ما تيجى فى حتة مكسرة أو تدوس فرامل فى مكان مكسر مع اهتزاز المقص و المساعد البيضة فى النص هتخبط فى بعضها
بص يا سيدى ببساطة إذا العفشة متربطة و كله تمام و برده بتسمع صوت تخبيط فى الاماكن المكسرة - صوت خبط مكتوم يبقى تبدأ تكشف على بيضة المقص
ازاى_نكشف_عليها
- هتنزل تمسك الكاوتش و تهزه يمين و شمال ب ايدك كأنك بتشخلعه
🤣 لقيته بيتهز كده و مش على بعضه تقوم مجرب الخطوة التانية- تنزل تحت العربية و تحط ايدك على البيضة بتاعت المقص و تخلى حد يقف يضرب الكاوتش بالشلوت فى الجنب و تشوف البيضة فى ايدك تحت العربية حسيتها بتلعب كده و بتشخلل فى بعضها تبقى بايظة يا معلم
:D
و الفردة هتلاقيها لما بتاخد بالشلوت كده مش على بعضها فيها هزة أو بوش
صغير ده نتيجة البوش بتاع بيضة المقص و لما هتفك المقص من العجلة هتلاقى
البيضة دى سايبه خالص- اخر اختبار هوه انك تخلى صاحبك يضغط على المساعد من فوق يعنى من عند الرفرف كده يهز العربية لتحت و فوق و ايدك على البيضة برده هيبان معاك سليمة ولا بايظة
سبب_تلفها
المشى فى الطرق المكسرة و الملفات و السير فى الطرق الغير ممهدة
اصلحها_ازاى
بص فى رأيين الأول انك تشترى مقص استيراد تكون البيضة بتاعته كويسة و ده نادر حبتين
الرأى التانى و اللى بفضله - انك تصلح المقص بتاعك طالما المعدن سليم و المقص سليم مش معووج ولا واخد خبطة هتشترى بيضة مقص CTR بتيجى معاها 3 مسامير و 3 صواميل بتيلة و بتفك برشام البيضة القديمة و تركب الجديدة و ده اللى انا عامله فى عربيتى و انصح بي .. الجديد جديد
👌إمتى تشترى مقص استيراد ؟! لما يكون جلب المقصات كلها بايظة و البيضة كمان بايظة هات مقص استيراد اهو تقلل على نفسك تكلفة الجلب و تبقى على قد البيضة بس
تمن بيضة المقص CTR ب 120 جنية عند الحاج عصام Essam Shehda Aboshab تواصلوا معاه لو عايزينها فى القاهرة و عنده شحن
اسيبكم مع الصور اللى بيشرح شكل بيضة المقص لو انكسرت ( اخر مراحل التلف )
و مكانها و شكلها من الداخل و شكل الجديدة
في حال أعجبك الموضوع كل ما اوده منك هو نشر هذا الموضوع عبر أدوات المواقع الاجتماعية التالية: ايقونة فيس بوك وتويتر و +1 فى الشريط التالى
لو سمحت العربيه فيها كام بيضه
ردحذف