ازاى تكشف على عفشة عربيتك بطريقة سهلة وتوفر فلوسك

ازاى تكشف على عفشة عربيتك بطريقة سهلة وتوفر  فلوسك
أول حاجة المساعدين  إزاى تكشف على حالة المساعدين ؟!
هتهز العربية من الأربع جهات (شمال قدام - شمال ورا)(يمين قدام - يمين ورا)
عن طريق إنك تيجى فى كل نحية من اللى قولنا عليهم دول تضغط عليها بقوة لو العربية ردت بسرعة يبقى العفشة بتاعت الحتة دى تمام .. أما لو ردت ونزلت تانى فا ده دليل على إن العفشة بتاعت الحتة دى ضعيفة وهيكون حاجة من الأتنين دول (ضعف ياى) أو إن المساعد خلاص الهوا اللى فيه فضى وممكن يجيبوا زيت ودي من (أعراض تلف المساعدين).
ولااااازم تكون دقيق ومتفوتش أى تفصيلة لأنك لو فوت حاجة جيبك هيفوت بعد كدة
————————————————
طب وأنا ماشى بالعربية ينفع أكشف علي العفشة ؟!
طبعآ ينفع وده الجزء الأسهل فى الموضوع ولازم تعرف إن عيوب العفشة أصلآ مش بتظهر غير والعربية ماشية مع المطبات بتاعتنا والبلاعات .. يلا نركز مع بعض
1- ناخد كام مطب أو بلاعة (بالراحة طبعآ عشان العربية متزعلش مننا) ونلاحظ مدى تماسك العفشة والعربية ككل ودرجة إحساسك بالمطب يعنى الصدمة بتجيلك جامدة ولا بتحس إن فيه تناغم كدة والعفشة شايلة عنك ؟! ولا رايحة فى داهية وتحس بكل حاجة ؟!
________________
2- أقف بالعربية وخلى الموتور داير ولف الطارة يمين وشمال لحد الاخر (لحد لما الدريكسيون يقف) لازم متسمعش صوت أى طقطقة أو تكتكة .. لازم متسمعش حاجة غير صوت إحتكاك الكاوتش ولو كانت العربية فيها باور لازم تشوف لو الدريسيكون فيه هزة ولا لأ حتى لو بسيطة وشوف لما تجيبه لحد الآخر بيرجع حبة ولا بيفضل ثابت على مكانه ؟! لأنه لو رجع من مكانه أو بيتهز فا ده دليل على حاجتين .. يا إما إن الاسكتره اللى ماسكة الدريسيكون وتوجيه العربية فيها مشكلة أو إن طلمبة الباور نفسها فيها مشكلة ..
————————————————
لازم تمشى بالعربية فى طريق مستقيم وتسيب الدريكسيون وتشوف العربية هتحدف يمين أو شمال .. لو حدفت يبقى تكشف عليها وتشوف هل مشكلة زوايا ولا الشاسيه فيه مشكلة ومحتاج مرسة هوا ولا المقصات فيها مشكلة ؟!
————————————————
وفيه إختبار حلو أووووي 🙌
إنك هتجيب سرعة مش أقل من 70 ومش أكتر من 80 وهتمور العربية ولو أوتو هتجيب الفتيس على N وهتدوس فرامل لحد الآخر بس مش كلبشة يعنى وتنقل رجلك على البدال بس بسرعة وفى نفس الوقت بهدوء وهتكون سايب الدريكسيون خالص .. لو العربية حدفت يمين أو شمال حاجة بسيطة متقلقش ده طبيعى نتيجة إنك سايب الدريكسيون أما لو حدفت حدفة جامدة يبقى تروح جاى ماسك الدريكسيون بسرعة وتعدل العربية وتركن وكدة يبقي ممكن أوي يكون السيرفو فيه مشكلة ومش بيوزع ضغط الزيت مظبوط أو طنبورة متاكلة وبتودع ..
————————————————
كمان وأنت ماشى شوف كدة أى U Turn تلفه بالعربية وأنت بتلف زود سنة بنزين خفيفة .. لو سمعت صوت طقطقة يبقى دى كبالن
————————————————
ملحوظات مهمة جدآ جدآ جدآ جدآ جدآ
1- العفشة لازم تتربط كل 20 ألف كيلو.
________________
2- متاخدش الملفات قفش وعلى سرعة عشان تحافظ على الكبالن.
________________
3- شحم العفشة دايمآ كل 20 ألف بعد التربيط.
________________
4- لما تركن العربية متكسرش العجل عشان تحافظ على الكبالن.
________________
5- حاول تتفادى النقر على قد ما تقدر.
________________
6- خد المطبات بالراحة جدآ عشان تحافظ على الإسكاترة.
________________
7- هز الدريسكيون وعينك على العجل لو من أى حركة بسيطة للدريسيكون العجل بيتحرك معاها يبقى كدة الإسكاتره تمام وإستجابتها تمام أما لو بيحصل العكس يبقى فيها سنة بوش وممكن ميكونش فيها بوش بس العلبة نفسها من جوة بدأت تروسها تتاكل من جوة ودى بتبقى أسمها حشوة علبة الدريسكيون ودى بتغيرها لما بتسمع صوت خبط مع أى أرض مش ممهدة وغربلة فى الطارة وهتحس بيها أكتر كمان بعد سرعة 80 .. أما لو الدريسكيون عندك تقيل يبقى الإسكاتره بتسرب زيت الباور وفى الحالة دى لازم الإسكاتره تتفك وتحل الجوانات والأويل سيلات اللى فيها اللى بتحجز الزيت.
________________
8- دايمآ فى كل تربيطة عفشة ربط على البطاحات أهم حاجة لأننا زى ما قولنا هى اللى ماسكة المساعد وبتخليه يلف يمين وشمال.
________________
9- لو بتسمع صوت طقطقة فى الملفات يبقى كبالن عمرها بينتهى.
________________
10- لما تسمع صوت تزييق يبقى كدة البطاحات وزى ما قولنا قبل كدة البطاحات دى هى اللى ماسكة المساعد ولو أى إهمال فيها ممكن تلاقى المساعد نط من مكانه.
________________
11- لو بتلف الدريكسيون فى ملف ومش بيرجع لوضعه الطبيعى معاك بسهولة يبقى كدة صليبة الدريكسيون عاوزة تتغير.


في حال أعجبك الموضوع كل ما اوده منك هو نشر هذا الموضوع عبر أدوات المواقع الاجتماعية التالية: ايقونة فيس بوك وتويتر و +1 فى الشريط التالى